زهيريات حب وعتب

تيهت دربي وتهت لمن شفت شامتك
ظل يمي لا تبتعد يفرح ولك شامتك
شامات بالخد شفت بس بالصدر شامه تك
صورك رب العرش وبيك الحسن دكه لك
سواك مثل الكمر وبالحنج دكه لك
ومن ايدك كلبي اعتقد دكه لي ودكه لك
يل بيك عطر الورد شكد طيبة لك ياشامتك؟



ما ارد حبيبي الك صدكني هذا وعد
ولاتكلي شنهو السبب احسب اجروحي وعد
ولاتعتذرلي بعد ولاتكلي ارجع وعد
ولا تخابرني ابد ومعزتك ما ارد
جرحتني لمن جنت بأيدك جني مارد
كلبي يدك بحبك وانت الي بيه مارد
ما ارد حبيبي الك صدكني هذا وعد؟



كتله احبك انه وسمعته كلمة غزل
من كلبي ملبس الك اغزل بنبضتي غزل
بس دار وجهه ومشه وماهمه كلبي الغزل
ثاريه ابيض يحب يكره شخص اسمر
مو صوجي كلته الشمس من الجلد اسمر
ماعوفه بيه طبع يشبه طبع اسمر
من جان فاقد غزل والزمن رجع غزل؟



مسدود باب الفرح بس انه اظل فاتحه
ومن مات عندي الصبر بيدي انصبت فاتحه
والي كلامه عوج انته بعد فاتحه
تدري بكلامي عدل مادورت لو فات
وميهمني كسر الضلع بين الكلب لو فات
جنت اني انسعد يمي الحلو لو فات
شو هسه لمن يمر يقرأ علي فاتحه؟



انزفت بالافراح زفت عرس زفتها
وروحي من الهموم بالحسن طور زفتها
دروب عني الزمان بظيم زفتها
وياحيف درب الفرح عن الوكت سدوه
وكلبي بالهم غرك ما فاد بي سدوه
يومين شفتها معاه وكاعده بسدو
تمنيت ميت كبل لا اشوف زفتها؟